བོད་ཀྱི་སྲིད་བྱུས་ཉམས་ཞིབ་ཁང་ནས་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་རཱ་ཇཱ་བཱིར་བྷ་ཌ་སིངྷ་༼༡༩༣༤_༢༠༢༡༽མཆོག་གི་དགོངས་རྫོགས་ཞེ་དགུའི་སྨོན་ལམ་དང་བསྟུན་ཁུ་ནུ་དང་བོད་དབར་འབྲེལ་བའི་ལོ་རྒྱུས་གླེང་བ་ཞེས་པའི་གཏམ་བཤད་ཀྱི་ལས་རིམ་ཞིག་གོ་སྒྲིག་ཞུས་པ།

དེ་རིང་བོད་ཀྱི་སྲིད་བྱུས་ཉམས་ཞིབ་ཁང་ནས། ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་པ་རཱ་ཇཱ་བཱིར་བྷ་ཌ་སིངྷ་༼༡༩༣༤_༢༠༢༡༽མཆོག་གི་དགོངས་རྫོགས་ཞེ་དགུའི་སྨོན་ལམ་དང་བསྟུན་ཁུ་ནུ་དང་བོད་དབར་འབྲེལ་བའི་ལོ་རྒྱུས་གླེང་བ་ཞེས་པའི་གཏམ་བཤད་ཀྱི་ལས་རིམ་ཞིག་གོ་སྒྲིག་ཞུས། ཞིང་གཤེགས་དམ་པ་རཱ་ཇཱ་བཱིར་བྷ་ཌ་སིངྷ་མཆོག་ནི་དུས་རབས་༡༧པའི་ནང་བོད་དང་ཁུ་ནུའི་བར་ཆིངས་ཡིག་འཇོག་མཁན་ཁུ་ནུ་རྒྱལ་པོ་སྐྱེས་སེངྒེའི་རྒྱལ་རྒྱུད་ཡིན་ལ། འདས་པའི་ལོ་དྲུག་ཅུ་ལྷག་གི་ནང་བོད་དོན་རྒྱབ་སྐྱོར་ལ་ལྷག་བསམ་དཀར་བར་མ་ཟད། ཁུ་ནུ་དང་བོད་དབར་མཛའ་མཐུན་འབྲེལ་བ་རྒྱུན་བསྐྱངས་པ་དང་། རང་རེའི་བཙན་བྱོལ་གཞུང་མང་གཉིས་ལ་ཕན་འགྱུར་རོགས་འདེགས་ཅི་རིགས་ཀྱི་བཀའ་དྲིན་བླ་མེད་བསྐྱངས་ཡོད་ཕྱིར་དམ་པ་ཁོང་ལ་རྗེས་དྲན་མྱ་ངན་ཞུ་འོས།

སྔ་དྲོ་ཆུ་ཚོད་9:30ཐོག་དབུས་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ་གནས་ཆུང་དགོན་པའི་དགེ་འདུན་པ་རྒན་གྲས་ཉི་ཤུ་ལྷག་ཚོགས་དབུས་སུ་ཞུས་ཏེ། བོད་མིའི་སྒྲིག་འཛུགས་ཀྱི་གཞུང་ཞབས་པ་དང་གཞན་ས་རཱ་མཐོ་སློབ་ཀྱི་ལོ་རྒྱུས་དགེ་རྒན་དང་སློབ་མ། ནོར་གླིང་མཐོ་སློབ་ཀྱི་སློབ་མ་སོགས་གཞུང་མང་འདུས་ཚོགས་ཡོངས་ནས་ལྷན་ཅིག་ཏུ་ཞིང་གཤེགས་དམ་པ་ཁོང་ལ་ཆུ་ཚོད་ཕྱེད་ཀའི་རིང་དགོངས་རྫོགས་ཞེ་དགུའི་མཆོད་འབུལ་སྨོན་ལམ་འཚོགས་པ་དང་། དེ་ནས་བོད་མིིའི་སྒྲིག་འཛུགས་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་དྲུང་ཆེ་ཟླ་བ་ཚེ་རིང་ལགས་ནས་ཞེ་དགུའི་དགོངས་རྫོགས་ཉིན་མོ་དང་བསྟུན་ཁུ་ནུ་དང་བོད་དབར་འབྲེལ་བའི་གཏམ་བཤད་ལས་རིམ་ངོ་སྤྲོད་ཀྱི་གསུང་བཤད་གནང་རྗེས། ཐེངས་འདིའི་གཏམ་བཤད་ལས་རིམ་ནང་ཆེད་དམིགས་ཀྱིས་གདན་ཞུ་ཞུས་པའི་དགེ་བཤེས་དང་མཁས་དབང་སོགས་གནད་ཡོད་མི་སྣ་བཅུ་ཡིས་དྲ་ལམ་བརྒྱུད་ནས་སོ་སོའི་བརྗོད་གཞིའི་ཐོག་གཏམ་བཤད་གནང་བ་དང་། མཇུག་ཏུ་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་གཞོན་པ་ཛམ་ལྷ་བསྟན་པ་རྒྱལ་མཚན་ལགས་ནས་ལས་ཁུངས་ཀྱི་ཚབ་བྱས་ཏེ། ཞིང་གཤེགས་དམ་པ་ཁོང་གི་ཞེ་དགུའི་དགོངས་རྫོགས་མཆོད་འབུལ་སྨོན་ལམ་ཐོག་ཕེབས་པའི་གཞུང་མང་འདུས་ཚོགས་ཡོངས་དང་། ཐེངས་འདིའི་ལས་རིམ་ནང་གཏམ་བཤད་གནང་མཁན་གྱི་མཁན་དགེ་བའི་བཤེས་གཉེན་དང་མཁས་དབང་རྣམས་ལ་ཐུགས་རྗེ་བཀའ་དྲིན་ཞུ་བའི་གསུང་བཤད་གནང་། །

ཐེངས་འདིའི་གཏམ་བཤད་ཀྱི་ལས་རིམ་འདི་གོ་སྒྲིག་ཞུ་དགོས་དོན་ནི། བོད་དང་ཁུ་ནུའི་བར་འདས་པའི་ལོ་རྒྱུས་རིང་ནས་ཆོས་དང་རིག་གཞུང་གི་འབྲེལ་བ་ཟབ་པ་གཞིར་བཞག་སྟེ། ལྷག་པར་༧གོང་ས་སྐྱབས་མགོན་ཆེན་པོ་མཆོག་གིས་ཟབ་ཆོས་ཞུ་སའི་མཁས་དབང་བླ་ཆེན་གཙོ་བོའི་གྲས་སུ་ཁུ་ནུ་བླ་མ་བསྟན་འཛིན་རྒྱལ་མཚན་མཆོག་ཀྱང་བཞུགས་པ་དང་། ལོ་རྒྱུ་སྟེང་གྲགས་ཆེ་བའི་བོད་ཡིག་ཚགས་ཤོག་དང་ཁུ་ནུ་ལོ་ཐོ་འདོན་སྤེལ་བྱེད་མཁན་ཡང་ཁུ་ནུ་པ་ཡིན་པ་སོགས། མ་འོངས་པར་བོད་དང་ཁུ་ནུའི་བར་ཆོས་དང་རིག་གཞུང་བརྗེ་རེས་དང་མཛའ་མཐུན་འབྲེལ་བ་རྒྱུན་གནས་ཡོང་བ། ཕྱི་རབས་བོད་ཀྱི་གཞོན་སྐྱེས་རྣམས་ལ་ཁུ་ནུའི་སྐོར་གྱི་ལོ་རྒྱུས་རིག་གནས་མཁྱེན་རྟོགས་ཡོང་ཆེད་ཡིན་ལགས་ན། གཏམ་བཤད་གནང་མཁན་རྣམ་པའི་བརྗོད་གཞི་གཤམ་གསལ་ལྟར་ལགས།

སྐུ་ཞབས་བྷ་ཀི་ཌི༙་སིངྷི་ཀེན་ནེར། བརྗོད་གཞི། ༼སྤྱི་ཁྱབ་བློན་ཆེན་ཟུར་པ་སྐུ་གཤེགས་རཱ་ཇཱ་བྷིར་བྷ་ཌ་སིངྷ་གི་ལོ་རྒྱུས༽ སྐྱབས་རྗེ་ལོ་ཆེན་རིན་པོ་ཆེ། བརྗོད་གཞི། ༼བོད་དང་ཁུ་ནུའི་འབྲེལ་བ་སྤྱི་བཤད༽ མཁས་དབང་ཤེས་རབ་ཆོས་འཕེལ་ནཱེགི། བརྗོད་གཞི། ༼དུས་རབས་༡༧ནང་བོད་དང་ཁུ་ནུའི་དབར་གྱི་ཆིངས་ཡིག་སྐོར༽ དགེ་རྒན་ཆེན་མོ་སེམས་དཔའ་རྡོ་རྗེ། བརྗོད་གཞི།༼ཁུ་ནུའི་ནང་དགེ་ལུགས་དགོན་པ་ཁག་དང་གདན་ས་ཆེན་པོ་བཀྲ་ཤིས་ལྷུན་པོ་དང་འབྲེལ་བའི་སྐོར༽ ཨ་ཅརྱ་རའོ་ཤན་ལལ་ནཱེ་གི། བརྗོད་གཞི། ༼ཁུ་ནུའི་ནང་འབྲུག་པ་བཀའ་རྒྱུད་ཀྱི་དགོན་པ་དུ་ཡོད་དང་འབྲེལ་བའི་སྐོར༽ མཁས་དབང་ཝེཌི༙་ཡ་ས་གཱར་ནཱེ་གི། བརྗོད་གཞི། ༼དེ་སྔ་ཁུ་ནུ་དང་བོད་དབར་ཚོང་འབྲེལ་སྐོར༽ མཁས་དབང་དབང་མཆོག་རྡོ་རྗེ་ནཱེ་གི། བརྗོད་གཞི། ༼བོད་དུ་ཁུ་ནུ་ནས་གྲྭ་རྒྱུན་འགྲོ་སྲོལ་དང་སློབ་གཉེར་གནང་སྟངས༽ དགེ་བཤེས་ཐུབ་བསྟན་རྒྱལ་མཚན། བརྗོད་གཞི། ༼༡༩༠༦ལོ་ནས་བཟུང་མི་རབས་བཞིས་བཏོན་པའི་གྲགས་ཅན་ཁུ་ནུའི་ལོ་ཐོའི་སྐོར༽ མཁས་དབང་རེམ་ཤུ་ཆན་ད་ར་མེ་ཋ་སི། བརྗོད་གཞི། ༼ཁུ་ནུ་བླ་མ་རིན་པོ་ཆེ་བསྟན་འཛིན་རྒྱལ་མཚན་(༡༨༩༤_༡༩༧༧)གྱི་རྣམ་ཐར༽  མཁན་རིན་པོ་ཆེ་རེམ་ཤུ་ཅན་རྡ་ར། བརྗོད་གཞི། ༼ཁུ་ནུ་དང་འབྲེལ་བའི་མཚོ་པདྨའི་སྐོར༽བཅས་ཡིན།