ཕྱི་ལོ་ ༢༠༢༤ ཟླ་ ༤ ཚེས་ ༡༨ ཉིན་འདི་ག་བོད་ཀྱི་སྲིད་བྱུས་ཉམས་ཞིབ་ཁང་ནས་བོད་གཞུང་དགའ་ལྡན་ཕོ་བྲང་སྐོར་གྱི་དཔྱད་རྩོམ་ཕྱོགས་བསྒྲིགས་ཞེས་པའི་དཔེ་དེབ་འདི་དངོས་སུ་པར་སྐྲུན་ལེགས་པར་གྲུབ་སྟེ། བོད་མིའི་སྒྲིག་འཛུགས་ཀྱི་ཕྱི་དྲིལ་བཀའ་བློན་ནོར་འཛིན་སྒྲོལ་མ་མཆོག་དབུ་བཞུགས་ཐོག་དཔེ་དེབ་འདིའི་རྩོམ་སྒྲིག་གི་ལས་འགན་འཁུར་དུ་བཞེས་པའི་བོད་ཀྱི་དཔེ་མཛོད་ཁང་གི་བོད་ཡིག་རྩོམ་སྒྲིག་པ་དང་ཉམས་ཞིབ་པ་རྒན་ན་ག་སངས་རྒྱས་བསྟན་དར་ལགས་ཀྱང་དམིགས་བསལ་སྐུ་མགྲོན་དུ་གདན་ཞུ་ཞུས་ཏེ། འདི་ག་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་དང་། འགན་འཛིན་གཞོན་པ་ཛམ་ལྷ་བསྟན་པ་རྒྱལ་མཚན། བོད་ཡིག་རྩོམ་སྒྲིག་པ་ཚེ་རིང་བསམ་གྲུབ་དང་གཞན་ཉམས་ཞིབ་ཁང་གི་ལས་བྱེད་རྣམས་བཅས་ཚང་འཛོམས་ཐོག་འདི་གའི་ཚོགས་ཁང་དུ་དཔེ་དེབ་དབུ་འབྱེད་གནང་།
ཕྱི་ལོ་ ༢༠༢༣ ཟླ་ ༩ ཚེས་༡༤ ནས ༡༥ བར་གྱི་ཉིན་གྲངས་གཉིས་རིང་། འདི་ག་བོད་ཀྱི་སྲིད་བྱུས་ཉམས་ཞིབ་ཁང་ནས་དམིགས་བསལ་འཆད་ཁྲིད་ཀྱི་ལེ་ཚན་ཞིག་གོ་སྒྲིག་ཞུས་ཏེ། ས་རཱ་བོད་ཀྱི་མཐོ་རིམ་སློབ་གཉེར་ཁང་གི་རྒན་བསོད་ནམས་རྒྱལ་མཚན་དང་། རྒན་སྟོབས་ལགས། ཏཱ་ལའི་བླ་མ་མཐོ་རིམ་སློབ་གཉེར་ཁང་གི་འབུམ་རམས་པ་རྒན་གཉན་ཐར་ལགས་གསུམ་བཅས་གདན་ཞུ་ཞུས་ཏེ། བོད་གཞུང་དགའ་ལྡན་ཕོ་བྲང་གི་ལོ་རྒྱུས་སྐོར་ནས་སོ་སོའི་བརྗོད་གཞིའི་ཐོག་འཆད་ཁྲིད་གནང་ཞིང་། ཕྱིས་སུ་འཆད་ཁྲིད་གནང་བའི་དཔྱད་རྩོམ་རྒྱས་སྡུད་རུབ་བྱས་ཏེ། ད་ཆ་དཔེ་དེབ་འདི་འཆད་ཁྲིད་ལེ་ཚན་འདིའི་གྲུབ་དོན་གྱི་ངོ་བོར་དཔར་སྐྲུན་བྱས་པ་ཡིན་པས། འདི་ག་སྲིད་བྱུས་ཉམས་ཞིབ་ཁང་ནས་ཀྱང་འཆད་ཁྲིད་འདིའི་གྲུབ་འབྲས་བཟང་པོ་ཞིག་ཏུ་ངོས་ལེན་བྱེད་ཀྱི་ཡོད།
དཔེ་དེབ་འདི་ལ་རྒྱལ་སྤྱིའི་ཚད་ལྡན་དཔེ་རྟགས་ཞུས་ཡོད་ལ། གཞུང་འབྲེལ་གྱི་དཔེ་དེབ་ཡིན་སྟབས་ཕྱིར་འཚོང་བྱེད་བཞིན་མེད། མི་འགྱངས་པར་བོད་མིའི་སྒྲིག་འཛུགས་ཀྱི་ལྷན་ཁང་ཁག་དང་། ས་གནས་འགོ་འཛིན་ལས་ཁུངས་ཁག དེ་བཞིན་བཙན་བྱོལ་ནང་གི་དགོན་སྡེ་ཁག་དང་སློབ་གྲྭ་ཁག་ལ་ཡང་དཔེ་དེབ་རེ་བསྐུར་རྩིས་ཡོད། གལ་སྲིད་ཀློག་པ་པོ་རྣམ་པས་དེབ་འདིར་གཟིགས་འདོད་ཡོད་ཚེ་འདི་ག་སྲིད་བྱུས་ཉམས་ཞིབ་ཁང་གི་དྲ་ཐོག་ནས་འཕྲུལ་དེབ་(PDF)ཕབ་ལེན་བྱས་ཆོག་གི་ཡོད།
