སྤྱི་ལོ་ ༢༠༡༥ ལོའི་ཟླ་ ༤ ཚེས་ ༡༦ ཉིན་ནས་ཚེས་ ༣༠ ཉིན་བར།
༡༽ ཕྱི་འབྲེལ་པུའི་དྲ་ཚིགས་ནས་སྤེལ་བའི་གནས་ཚུལ་ལྟར་ན། ཟླ་ ༤ ཚེས་ ༡༦ ཉིན་ཕྱི་འབྲེལ་པུའི་མགྲིན་ཚབ་པ་ཧུང་ལེ་ཡིས་གསར་འགོད་པའི་འཆར་ཅན་ཚོགས་འདུ་གཙོ་སྐྱོང་བྱས་ཤིང་། ཚོགས་འདུའི་ཐོག་ཧུང་ལེ་ཡིས་ཏཱ་ལའི་བླ་མའི་སྤྲུལ་སྐུའི་སྐོར་དང་ཨ་ཧྥེ་རི་ཁ་ལྷོ་མར་ཡོད་པའི་ཀྲུང་གོའི་གཏན་སྡོད་ཕྱི་མིའི་ཚོང་ཁང་ལ་འཕྲོག་བཅོམ་ཐེབས་པའི་སྐོར་དྲིས་ལན་བཏབ་པ་རེད།
གསར་འགོད་པས་དྲི་བ། ཏཱ་ལའི་བླ་མ་རང་གིས་རང་ཉིད་ཀྱི་སྤྲུལ་སྐུ་ངོས་འཛིན་བྱེད་མིན་ཐག་གཅོད་བྱེད་ཅེས་པའི་བཤད་སྟངས་ལ་ཀྲུང་གོའི་ཕྱོགས་ནས་དཔྱད་གཏམ་ཅི་ཞིག་ཡོད་དམ།
ཧུང་ལེ་ཡིས། ཀྲུང་གོའི་སྲིད་གཞུང་གིས《ཆོས་ལུགས་ལས་དོན་སྐོར་གྱི་སྲོལ་ཡིག》དང་《བོད་བརྒྱུད་ནང་བསྟན་གྱི་སྤྲུལ་སྐུ་ངོས་འཛིན་དོ་དམ་བྱ་ཐབས》ཁྱབ་བསྒྲགས་བྱས་ཡོད་ཅིང་། མིག་སྔར་སྤྲུལ་སྐུའི་ཡང་སྲིད་ངོས་འཛིན་སྐོར་གྱི་ལས་དོན་ཐོག་མཐའ་བར་གསུམ་དུ་ཆོས་ལུགས་ཀྱི་ཆོ་ག་དང་རྒྱལ་ཁབ་ཀྱི་ཁྲིམས་ལུགས་ཁྲིམས་སྲོལ་ལྟར་རྒྱུན་ལྡན་ངང་སྤེལ་བཞིན་ཡོད།
ཏཱ་ལའི་བླ་མའི་སྤྲུལ་སྐུ་ངོས་འཛིན་བྱེད་སྲོལ་ལ་ལོ་བརྒྱ་ཕྲག་ཁ་ཤས་ཀྱི་ལོ་རྒྱུས་ཡོད་ཅིང་། དེ་ལ་ཆོས་ལུགས་ཀྱི་ཆོ་ག་དང་ལོ་རྒྱུས་ཀྱི་གཏན་ཁེལ་སྒྲིག་སྲོལ་ཆ་ཚང་བ་ཡོད་པ་རེད། ཏཱ་ལའི་བླ་མའི་སྤྲུལ་སྐུ་ངོས་འཛིན་བྱེད་རྒྱུ་དེ་ཡང་ཆོས་ལུགས་ཀྱི་ཆོ་ག་དང་། ལོ་རྒྱུས་ཀྱི་གཏན་ཁེལ་སྒྲིག་སྲོལ། རྒྱལ་ཁབ་ཀྱི་བཅའ་ཁྲིམས་དང་ཁྲིམས་སྲོལ་བཅས་ལ་བརྩི་སྲུང་ཞུས་ཏེ་སྤེལ་དགོས། ཞེས་བཤད་འདུག ༼ཆ་འཕྲིན་འབྱུང་ཁུངས། མི་དམངས་དྲ་བ་ནས། ཟླ་ ༤ ཚེས་ ༢༡ ཉིན༽[རྒྱས་པར་འདི་གཟིགས]