༄༅། །རྒྱ་དམར་གཞུང་གིས་བོད་ས་ཡོངས་རྫོགས་དབང་སྒྱུར་བྱས་ཏེ་ལོ་ ༥༦ ལྷག་སོང་བའི་ད་ལྟ་བོད་ཀྱི་ཉེ་རབས་ལོ་རྒྱུས་ལ་ཕྱིར་གདང་ཞིག་རྒྱབ་ན། བོད་པ་ཙམ་མ་ཚད། བོད་རིག་པ་བ་མང་པོའི་བསམ་བློའི་ནང་ཕྱི་ལོ་ ༡༩༥༡ ལོར་རྒྱ་དམར་གཞུང་གིས་བོད་ཀྱི་སྐུ་ཚབ་ལ་གནོན་ཤུགས་སྤྲད་དེ་གྲོས་མཐུན་དོན་ཚན་བཅུ་བདུན་ཟེར་བ་ཞིག་ཐོག་མིང་རྟགས་འགོད་བཅུག་ཡོད་པ་དེ་རྒྱ་ནག་ལ་བོད་རྒྱ་ཁོངས་ཡིན་པར་ཤོད་པའི་མིང་ཙམ་གྱི་ལག་ཆ་ཞིག་ཏུ་གྱུར་ཡོད་པའི་ཚོར་སྣང་ཟློག་མེད་དུ་ཡོང་གི་ཡོད།
འོན་ཀྱང་། གྲོས་མཐུན་ཡིག་ཆ་དེའི་ཁྲིམས་མཐུན་རང་བཞིན་ཐོག་གྲོས་མཐུན་འཇོག་མཁན་བོད་རྒྱ་ཕྱོགས་གཉིས་གཅིག་པུ་མ་ཡིན་པར། རྒྱལ་སྤྱིའི་མཁས་པའི་ཁྲོད་དུའང་རྩོད་གླེང་ཤུགས་ཆེན་པོ་བྱུང་དང་འབྱུང་བཞིན་ཡོད། རྒྱལ་སྤྱིའི་ ཐོག་བོད་རྒྱའི་གྲོས་མཐུན་དེ་ཕན་ཚུན་འདྲ་མཉམ་ཉན་བཤད་ཀྱི་ལམ་ནས་བྱུང་མེད་པར། རྒྱ་ནག་གཞུང་གིས་བོད་ཀྱི་སྐུ་ཚབ་ལ་སྡིགས་ར་བསྐུལ་ནས་བཙན་འགེལ་བྱས་ཡོད་པར་ཡོངས་གྲགས་སུ་ཁས་ལེན་བྱེད་ཀྱི་ཡོད། འོ་ན་བོད་ཀྱི་སྐུ་ཚབ་ལ་རྒྱ་ནག་གཞུང་གིས“སྡིགས་ར”ཇི་ལྟར་བསྐུལ་ཡོད་དམ། རྒྱ་ནག་གཞུང་གི་སྡིགས་རར་མ་བཟོད་པར་བོད་ཀྱི་སྐུ་ཚབ་ཚོས་གྲོས་མཐུན་ལ་ཁས་ལེན་བྱས་ཡོད་པ་ཙམ་གྱིས་གྲོས་མཐུན་ཡིག་ཆ་དེ་ཁྲིམས་མཐུན་མིན་པའམ། ཡང་ན་ཁྲིམས་མཐུན་ཡིན་པར་གྲུབ་ཐུབ་བམ། དོགས་དྲི་འདི་ཚོ་རྩོམ་ཡིག་འདིའི་ཞིབ་འཇུག་གི་དྲི་བ་ཁག་ཡིན། གྲོས་མཐུན་དེའི་ཁྲིམས་མཐུན་གནས་བབས་ལ་དཔྱད་པ་བྱེད་པར་ཐོག་མར་བོད་གཞུང་གིས་གྲོས་མཐུན་དེ་གནས་སྟངས་ཅི་འདྲ་ཞིག་འོག་འཇོག་དགོས་བྱུང་ཡོད་པར་དཔྱད་པ་བྱེད་རྒྱུ་ཞིབ་འཇུག་གི་གོམ་པ་དང་པོ་ཡིན་དགོས་ངེས་རེད།[PDF]